Home » Hagnýtar upplýsingar fyrir nýja kennara

Hagnýtar upplýsingar fyrir nýja kennara

Húsnæði
Menntaskóli Borgarfjarðar er til húsa í Hjálmakletti við Borgarbraut 54. Húsið er reist sem menningarhús og auk skólans rekur hljóðver RUV á Vesturlandi starfsemi sína þar. Hátíðarsalur skólans er nýttur til kennslu en er jafnframt leigður út fyrir ýmsa viðburði utan skólatíma.

Skrifstofur skólameistara, aðstoðarskólameistara og fjármálastjóra eru á annarri hæð inn af móttökurými. Þar er einnig lítið fundaherbergi sem og vinnustofa kennara. Kennarar vinna í opnu rými en hafa aðgang að eigin bókahillum og læstum skápum fyrir gögn. Kennslustofur eru níu talsins, á fyrstu og annarri hæð skólabyggingarinnar. Skrifstofa námsráðgjafa er á annarri hæð.

Félagsaðstaða nemenda er í Mími, sal í kjallara Hjálmakletts.

Tölvuumsjón
Hjalti R. Benediktsson hefur umsjón með tölvu- og netmálum í Menntaskóla Borgarfjarðar. Hann úthlutar lykilorðum sem veita aðgang að netkerfi skólans. Í skólanum er öflugt þráðlaust net sem  nemendur hafa aðgang að öllum stundum. Tvö önnur þráðlaus net eru í skólanum; eitt fyrir starfsfólk og annað fyrir gesti hússins.

Inna
Inna (www.inna.is ) er notuð til að halda utan um mætingar nemenda, halda til haga athugasemdum um nemendur og einkunnum. Merkja skal fjarvistir daglega. Til að skrá mætingar í einstökum tímum er smellt á Ft. Þegar smellt er á tölustafinn (númer hóps) sem er innan sviga á eftir áfangaheiti, t.d. (1) á eftir ÍSL 204 þá birtast upplýsingar um hópinn (nöfn, kennitölur, heimilisföng, símanúmer, netföng o.fl.). Með því að smella á viðverulista má fá upplýsingar um fjarvistir nemenda. Umsjónarmaður Innu í Menntaskóla Borgarfjarðar er Lilja S. Ólafsdóttir, aðstoðarskólameistari.

Moodle
Námsumsjónarkerfið Moodle heldur utan um alla áfanga í skólanum. Moodle býður upp á mikinn fjölda hagnýtra kennsluverkfæra á borð við öflugt einkunnabókhald, hugbúnað til prófagerðar og verkefnaskila, umræðuþræði, rauntímaspjall, gagnagrunna o. fl. Mögulegt er að skilyrða tímasetningar prófa og verkefna nákvæmlega, birta eða fela efni eftir þörfum, skilyrða þátttöku í prófi miðað við útkomu í fyrra verkefni o.fl.  Um Moodle má fræðast nánar á aðalvef Moodle http://docs.moodle.org/en/About_Moodle og á Wikipedia http://en.wikipedia.org/wiki/Moodle .

Skjávarpar, ljósritun, skrifstofuþjónusta
Skjávarpar, tjald og tengi fyrir fartölvu eru í öllum stofum.

Ljósritunarvél er á skrifstofu skólans á annarri hæð. Vélin er afar fullkomin og getur ljósritað/prentað báðum megin, skannað, heft og gatað. Auðvelt er að skanna inn skjöl og myndir og sendir vélin það sem skannað er sem tölvupóst til viðkomandi kennara. Veronika Sigurvinsdóttir, skólafulltrúi, aðstoðar við notkun vélarinnar og sér um ljósritun fyrir nemendur og kennara eftir þörfum.

Skrifstofuvörur og möppur má finna í ljósritunarherbergi og hjá Veroniku á skrifstofu skólans.

Bókasafn
Ekki er starfrækt bókasafn í Menntaskóla Borgarfjarðar. Skólinn býr þó yfir allnokkrum bókakosti sem geymdur er á fyrstu hæð skólahússins. Nemendur og kennarar hafa aðgang að þeim bókum og þurfa að láta Veroniku skólafulltrúa vita fái þeir lánaða bók. Héraðsbókasafn Borgarfjarðar veitir nemendum og kennurum MB góða þjónustu.

Mötuneyti
Nemendur og kennarar hafa aðgang að sameiginlegu mötuneyti. Matráður er Eygló Harðardóttir. Boðið er upp á hefðbundinn heimilismat á vægu verði í hádeginu. Matarmiðar fást hjá Veroniku skólafulltrúa. Þá geta nemendur og starfsfólk keypt sér morgunmat eða þegið ókeypis hafragraut í morgunhléi kl. 9.40. Einkunnarorð mötuneytisins eru hollusta og góð næring.

Heilsueflandi framhaldsskóli
Menntaskóli Borgarfjarðar tekur þátt í verkefninu Heilsueflandi framhaldsskóli sem er á vegum Lýðheilsustöðvar, mennta- og menningarmálaráðuneytis, heilbrigðisráðuneytis, SÍF (Sambands íslenskra framhaldsskólanema) og HÍF (Hagsmunaráðs íslenskra framhaldsskólanema). Markmið þess er að stuðla að velferð og góðri heilsu nemenda og starfsmanna í framhaldsskólum. Verkefnið stendur í fjögur ár og er stuðst við eitt þema á ári.  Fyrst er þemað næring (2011 – 2012), þá hreyfing (2012 – 2013), geðrækt (2013 – 2014) og loks lífsstíll (2014 – 2015).

Stýrihóp Menntaskóla Borgarfjarðar í verkefninu Heilsueflandi framhaldsskóli skipa eftirtaldir:

Harpa Bjarnadóttir nemandi

Máni Hilmarsson nemandi
Bjarni Þór Traustason, kennari og forvarnafulltrúi
Elín Kristjánsdóttir náms- og starfsráðgjafi
Eygló Harðardóttir matráður
Guðlín Erla Kristjánsdóttir foreldri
Íris Sigmarsdóttir skólahjúkrunarfræðingur
Lilja S. Ólafsdóttir aðstoðarskólameistari
Sigurður Örn Sigurðsson íþróttakennari
Vildís Bjarnadóttir forvarnafulltrúi Borgarbyggðar